مرضيه احمدى اوسگويى ۱۹۴۵ اینجی ایلینده گونئی آذربایجانین اوسگو شهرینده آنادان اولموشدور. تحصیل آلان زمانی مارکسیستی اثرلریلن تانیش أولیر و یونیورسیتت تعطیل ائتمک فععالیتلرینده ایشتیراک ائدیر. ۱۹۷۱ اینجی ایلینده شاه حاکمییتینین ساواک تشکیلاتی أونو توتوپ وتهراندان اسگویه یوللیر. ۱۹۷۲ اینجی ایلینده بیر نئچه یولداشلارینین ایشتراکیله بیر مارکسیستی تشکیلات یارادیر و بیر ایل سونرا "خالقین فدائی چریکلرینین" تشکیلاتینا قؤشولور. ۱۹۷۴ اینجی ایلینده آئپریل آیینین ۲۶ سیندا ساواک عاميلریله اوز- اوزه ساواشدا اؤز جانینی ایدآللارینین یولوندا فدا ائدیر.
مرضيه اوسگويى بير يازیچی، بير شاعير و بيرمعللیم ایدی. أو قیسسا عموروندا معنالی و اوره گه یاتان شعرلر قوشدی.مرضیه أوز دئدیغی سؤزه "من یازماقلا یاشاماق ایسته میرم ــ یاشا میملا یازماق ایسته ییرم" وفا ادیب و أوز جسارتیله مینلر صحیفه یازدی. مرضیه نین شعرلرینین بیر نئچه سیني اوخویوپ و أولکه میزین بو فداکار یازیچی قادینین امکلرین اؤنودمیاق.
خيرداجا آرخ
خيرداجا، ايشجه آرخيديم
مئشه لردن، داغلاردان
دره لردن آخيرديم
بيليرديم دورقون سولار
ايچينده بوغولار
بيليرديم دريالاردا
دالغالار قوجاغيندا
خيرداجا آرخلار اوچون
يئني حيات دوغولار
نه يولون اوزاقليغي
نه قارانليق چوخورلار
نه دورقونلوق هوسي
مني يولدان قويمادي
ايندي قاريشميشام من
قورتولماز دالغالارا
وارليغيميز چاليشماق
يوخلوغوموز دايانماق
گونوم! چيخ، چيخ
اوشاقليق عالمى ايدى، اوره ييم ايشيق ايدى
كيچيك، تميز دونياما، اويون ياراشيق ايدى
يولداشلاريم دؤورومده، هاميسى شاد، كينه سيز
بير آن كوسو اولسايدى، گينه باريشيق ايدى
قارانليق قورخمالى ايدى، آمما اوندان قاچمازديق
گئجه لر ناغيللاردا، شيرين، تميز محببت
بيزى باريشديراردى، دئمك اونا گؤره ده
كؤنلوموزون قاپيسين، كينه لره آچمازديق
ائله بيل گؤزلريميز، گئجه لر ده گؤروردو
اولدوزلار، آى گونش تك، بيزه ايشيق وئره ردى
بير بئله ايشيقينان، گؤيه بولوت گلسه يدى
گئچه رى كيچيك بولوت، گونون اوستون آلسايدى
بيلرديك گون چيخاجاق، بولوت دا قالماياجاق
گئنه ده دسته له شيب، دؤزمه ييب باغيرارديق
گونشى نغمه لرله، قوناغا چاغيرارديق
"گونوم گئديب سو ايشسين، آبى دونون دييشيسن"
…………
"!گونوم! چيخ، چيخ"
سحر سحر
سحر سحر يوردوموزدان، قارانليق گئجه قاچماميش
هله گونش قيزيل ساچين، اوجا داغلاردا آچماميش
بئش قهرمان، ياددا قالان، تاپشيريلدى جللادلارا
مينلر تميز سئوه ن قلبه، ووردو جللاد درين يارا
تازا قانلار قوروماميش، گئنه تؤكولدو ناحاق قان بوردا
بو جور ايستى، قيرميز قانلار، بزه ك وئرير بيزيم يوردا
سونسوز دوشمن، نئجه قانسين؟، ائللر، آزادليق يولوندا
قانماز توفان بيله بيلمز، لاله فصلينده، باهاردا
بير گول چمندن سولدورسا، مينلر تازا لاله لر آچار
بير قهرمان شهيد اولسا، مين اوره كدن قورخو قاچار
آيلار، ايللر
آيلار، ايللر دولاندى
زامان ناققا باليق تك، اوشاقليغيمى اوتدو
گئچه رى غملريمين، كيچيك سئوينجلريمين
يئرين بؤيوك كدرلر، گئچمز كينه لر توتدو
گونش بيزيم مملكتدن اوغورلاندى، توتولدو
ايستى، ايشيق چئشمه سى، پاك قورودو، قورتولدو
ايندى ايللردن برى، گئجه لريمى آيسيز
گوندوزلريمى گونسوز، باشا چيخارديرام من
سويوق، نيفرت، آلدانميش يوردوموزو بورويوب
شادليغين، سعادتين كؤكو ديبدن قورويوب
هئچ زاد قارانليق كيمى، منيم كؤنلومو سيخمير
او دؤزمز اوشاقليغيم، بير آن ياديمدان چيخمير
ايندى نئجه تابلاشيم بير بئله قارانليغا؟
داها دوشونوره م كى گونش تكجه بوردان يوخ
آيرى اؤلكه لردن ده، يامانجا اوغورلانيب
بونو دا دوشونوره م، گونشلرين دوستاغين
اوشاقليقدا اوخويان نغمه لر ييخا بيلمز
او قارا دوستاقلاردا، يالقيز سس چيخا بيلمز
آتا بابا سؤيله ين، دمير چاريق كؤهنه ليب
ايندى بو چتين يولدا دمير آياق لازيمدير
دمير عصا آتيليب، ناغيللارا قاتيليب
ايندى دميردن توفنگ، حدسيز و حئسابسيز فيشنگ
خالقين سؤنمز عئشقيندن، بوردا داياق لازيمدير
هر كس گونشى سئوسه، بوتون سئوگيسين آتار
يورولوب يولدا قالماز، اؤزون ده يادا سالماز
اوزاق داغلار داليندان، گئده ر گونشى تاپار
ايندى سوروشمالييام، من گونشى سئويره م؟
!من گونشى سئويره م
Kaydol:
Kayıt Yorumları (Atom)
Hiç yorum yok:
Yorum Gönder